Kelly Online:恒指創新高 重溫《大時代》股票必勝法

港股今日收市31983點創歷史新高，升穿2007年紀錄高位，唔少股民都好興奮，話要擦餐勁慶祝一吓。面對港股「大時代」來臨，唔少人又會記起呢套神劇，Kelly有朋友就好有心機，精選劇中經典對白，話教小妹「股票必勝法」喎，你又記得幾多？

「升！升！升！升！升！」呢句出自丁蟹同方展博對決，喺「大奇跡日」，方展博同陳滔滔一齊叫股市升，係咪好啱呢排股市升浪呢？

不過，講到劇中有關股壇金句，唔少得江毅飾演嘅股壇大鱷陳萬賢，當中唔少被視為股票投資心法。例如：

「唔識股票學人玩股票，結果咪俾股票玩返轉頭啦！」

「幾多街市婆呀是但攞隻嚟買都發咗達啦！」

「未買過唔緊要，只要夠運呀，盲拳都會打死老師父啦！」

「股票之道在於人棄我取，當大家買跌嘅時候呢，你一定要買升！」

「你幾時見過成村人買股票會發嘅啫？來來去去咪得幾個人！」

不過咁多金句，最重要嘅就梗係「股票必勝法」！「必勝法」出自葉天口中，其實大家都唔知佢講咩，劇中交代方展博靠電腦分析，解開謎團。必勝法真意其實係「股市原意，乃讓集資投資有其地，社會向榮，人皆有賺，惜人性貪婪，耗盡心思，巧取豪奪，樂土成煉獄，血雨腥風，殺戳不息，無數人蕩產傾家輸性命，勝者則喪良知人格，余於股壇數十載，未嘗見一真正鸁者，智者應知此乃一處永無贏家之戰場，取勝唯一法……『及早離去』！」

提起《大時代》，「金句王」首推丁蟹啦。大家最印象深刻的，相信係「大奇跡日」，丁蟹輸凸成幅身家時講「唔好驚，係技術性調整，唔好驚。」……不過大家唔係丁蟹，相信呢句用唔著嘞。